3 маусым күні, Қазақстан Республикасының Мемлекеттік рәміздер күні қарсаңында, Президенттік орталық ауқымды патриоттық сабақ өткізілетін алаңға айналды. Орталыққа елордалық №79 мектеп-лицейінің жанындағы жазғы лагерьдің 100-ден астам оқушысы келді. Олардың сапарындағы басты оқиға «Қазақстанның мемлекеттік рәміздері» атты танымдық дәріске қатысу болды.
Іс-шараның негізгі мақсаты – оқушылардың Қазақстан Республикасының мемлекеттік рәміздері туралы білімдерін тереңдету, олардың азаматтық сана-сезімін қалыптастыру, елге деген мақтаныш сезімі мен шынайы патриотизмді нығайту.
Тақырыптық дәріс жас тыңдаушыларға бейімделген интерактивті форматта ұйымдастырылды. Дәріскер балаларға еліміздің басты геральдикалық белгілерінің жасалу және қабылдану тарихын жан-жақты таныстырды. Әңгіме барысында әрбір элементтің терең философиялық мәніне ерекше назар аударылды: алтын күннің, қалықтаған қыранның және ұлттық өрнек бейнеленген тік жолақтың бейбітшілік, еркіндік пен мәңгіліктің нышаны ретіндегі мағынасы; Қазақстандағы барлық этностарға ортақ үйдің бейнесі саналатын шаңырақтың киелі мәні, жарқын болашаққа ұмтылысты білдіретін қанатты тұлпарлар мен бесжұлдыздың символикасы; сондай-ақ ата-баба ерлігін, туған жердің байлығын және бірлікке деген ұмтылысты жырлайтын Әнұран мәтініндегі поэтикалық бейнелер кеңінен түсіндірілді.
Дәріс барысында мемлекеттік рәміздердің әрбір Қазақстан азаматы үшін маңызын терең түсіну және оларға құрметпен қарау қажеттігіне ерекше көңіл бөлінді. Дәріскер Туға, Елтаңбаға және Әнұранға деген құрмет – нағыз патриоттың, саналы азаматтың және Отанын сүйетін адамның басты белгісі екенін атап өтті.
Сапар аясында оқушылар үшін Президенттік орталықтың музейлік экспозицияларына қысқаша шолу экскурсиясы ұйымдастырылды. Бағдарламаның басты нүктесі Қазақстанның мемлекеттік рәміздеріне арналған зал болды. Мұнда балалар Елтаңба мен Тудың эталондық үлгілерін өз көздерімен көріп, республиканың егемендігін бекіткен архивтік құжаттармен және алғашқы жарлықтармен танысты. Бұл көрнекі материалдар дәрісте алған білімдерін толықтыра түсті.
