14 наурыз күні сағат 11:00-де ҚР ПІБ Президенттік орталығында «Наурыз.Таным.Тарих» атты интерактивті экскурсиялар апталығының салтанатты ашылуы өтеді. Наурыздың 14-і Наурыз мейрамы – Көрісу күні мерекесінің бастауы болуының символикалық мәні бар.
Бұл іс-шараға мәдениет қайраткерлері, елордалық жоғары оқу орындарының оқытушылары мен студенттері, мемлекеттік органдардың өкілдері, сондай-ақ Астанадағы белсенді ұзақ өмір сүру орталықтарына келушілер мен елордалық гидтер клубының мүшелерінен 100-ден астам адам қатысады.
Биылғы жылы Наурыз мейрамы «Наурызнама» форматында – он күндік мәдени және рухани шаралармен кеңінен атап өтіледі.
Көрісу күні – бірліктің, ізгі тілектер мен сыйластықтың белгісі, сондықтан іс-шара жылы әрі достық атмосферада өтеді. Мерекелік көңіл-күйді «Жастар» театрының әртістері, Еркеғали Рахмадиев атындағы мемлекеттік академиялық филармония өнерпаздары және №1 Тәттімбет атындағы өнер мектебінің дарынды оқушылары сыйлайды. Бұл ерекше шара уақытқа саяхат жасап, ұлттық мәдениеттің бастауларына үңілуге және Наурыз мейрамының терең мағынасын түсінуге мүмкіндік береді.
Қазақстан Республикасы Президенттік орталығына келушілерді қазақтың дәстүрлі киімдері мен музыкалық аспаптарымен таныстыратын «Бір жәдігердің тарихы» жобасы аясында кітап көрмесі, көрікті жерлер, тақырыптық экскурсиялар ұйымдастырылады.
18 наурызда «Ұлт құндылығы – домбыра» атты тақырыптық экскурсия өтеді. Қонақтар қазақтың ұллтық аспабының қасиетті мәнімен танысады. Домбыра жасаушы шебер Бауыржан Ардақұлы мен виртуоз домбырашы, күйші, Қазақстанның еңбек сіңірген қайраткері – Анар Айтбайқызы Мұздаханова құпия сырларымен бөліседі.
20 наурызда қазақ әйелдерінің ұлттық киіміне арналған «Тарихтың алтын өрнегі» тақырыптық экскурсиясы өтеді. Қонақтар Фатима ханшайымның бешпентінің қайталанбас реконструкциясын көріп, ұлттық киім арқылы өткен ғасырлардағы қазақ әйелдерінің мәртебесі мен дүниетанымын бағамдай алады.
Баршаңызды Ұлыстың ұлы күні – Наурыз мейрамының рухын сезінуге, қазақ халқының бай мәдени мұрасын танып білуге жол ашар «Наурыз. Таным. Тарих» атты мерекелік апталыққа қатысуға шақырамыз!
БАҚ өкілдері аккредитациядан өтуі тиіс!
Оған қажетті мәліметті кестеге сәйкес 13.03.2025 күнгі сағат 18.00-ге дейін presidentcenterkz@gmail.com электрон поштасына жіберген жөн.
Байланыс нөмірі: 8 (7172) 69-30-57, +7 707 955 59 05 (Оңалбаева Сауле).
Мекенжай: Астана қ., Бөкейхан көшесі, 1а.
