26-27 ақпан және 5-6 наурыз күндері Қазақстан Республикасы Президенттік орталығының қызметкерлері Астана қаласының, Ақмола және Алматы облыстарының, сондай-ақ Абай облысының жоғары сынып оқушыларына «Әділетті қоғам: саяси қағидаттар және құндылықтар жүйесі» екі күндік вебинарлар өткізді.
Оқыту бағдарламасының мақсаты – Қазақстан Президенті Қ.К. Тоқаевтың әділ және құқықтық мемлекет құруға, сондай-ақ жастарды қазіргі басқару шешімдерімен және ел дамуының стратегиялық бағыттарымен таныстыруға бағытталған идеялары мен бастамаларын насихаттау. Тренингтердің басты міндеті – жастардың мемлекеттің болашағына деген жеке көзқарасын қалыптастыру, азаматтық-патриоттық сана мен тиімді тұлғалық қасиеттерді дамыту, сондай-ақ әділетті және адал қоғам құру жолдарын талқылау.
Семинар-тренингке қатысушылардың бірі, Алматы облысы Ынтымақ ауылының №30 орта мектебінің 10-сынып оқушысы Әсем Әбдіманат былай ой бөлісіпті: «Әділетті қоғам: саяси қағидаттар және құндылықтар жүйесі» семинарына қатысқаныма өте қуаныштымын. Оқу бағдарламасында әділетті қоғамның негізгі принциптері, оның саяси және моральдық аспектілері талқыланды. Спикерлер саяси әділеттілік, заң алдындағы теңдік және қоғам құндылықтары тақырыптарын жақсы аша білді. Әсіресе, қатысушылар өз пікірлерін ашық білдірген пікірталастар ерекше ұнады».
«Ең басты менің түйгенім – жаңа Қазақстан үшін қазіргі заманның жаңа қасиеттеріне ие, басқаша ойлайтын жаңа ұрпақ қажет. Әділдік – мемлекет саясатындағы ең басты басымдық», – деп атап өтті Астана қаласының №27 мектеп-лицейінің оқушысы Артем Надточин.
Елордадағы №27 мектеп-лицейінің география пәнінің мұғалімі Динара Оразбаева ұйымдастырылған семинар-тренинг үшін алғысын білдіріп, елдің өскелең ұрпағы үшін осындай іс-шаралардың маңыздылығын атап өтті. Өйткені жастар – елдің болашағы ғана емес, сонымен қатар әлеуметтік, экологиялық және саяси процестерге елеулі үлес қоса алатын бүгінгі күннің белсенді буыны.
