ҚР ПІБ Президенттік орталығында Л.Н. Гумилев атындағы ЕҰУ және әл-Фараби атындағы ҚазҰУ студенттері «Әділетті қоғам: саяси қағидаттар және құндылықтар жүйесі» атты екі күндік семинар-тренингке қатысты.
– Біздің оқу-тәжірибелік сабақтарымыздың мақсаты – Мемлекет басшысы Қ.К. Тоқаевтың әділетті әрі құқықтық мемлекет құру жолындағы шешімдері мен бастамаларын кеңінен насихаттау, сондай-ақ жастарды қазіргі таңдағы жаңа да өзекті басқару шешімдерімен және Қазақстанды дамытудың стратегиялық бағыттарымен таныстыру. Тренингтер мемлекеттің бүгіні мен болашағына жеке көзқарастарын, азаматтық-патриоттық сананы дамытуға, жеке тұлғаның тиімді қасиеттерін дамытуға, әділ де адал азаматтық қоғам құрудың жолдары мен нақты қадамдарын талқылауға және әзірлеуге бағытталған, – деп атап өтті ҚР ПІБ Президенттік орталығы директорының орынбасары Серік Сыдықов.
Бірінші күні студенттер дәрістер тыңдап, тренингтерде практикалық тапсырмаларды орындап, Президент орталығының музейін аралады.
Екінші күні қатысушылар оқу курсын аяқтап, «Әділетті Қазақстан – тең мүмкіндіктер мен прогресс елі» кездесуіне қатысты.
Спикер ретінде есірткіге және ойынға тәуелділіктің алдын алу жөніндегі халықаралық сарапшы, «ESBOL QORY» қорының төрағасы Жандос Ақтаев сөз сөйледі.
Екі күндік оқу бағдарламасының қорытындысы бойынша тыңдаушыларға сертификаттар мен ҚР Президенттік орталығының директоры Б.Б. Темірболаттың атынан ең белсенді қатысушыларға Алғыс хаттарды тапсыру рәсімі өтті.
Іс-шара соңында семинар-тренингке қатысушылар ҚР ПІБ Президенттік орталығының басшылығы мен қызметкерлеріне семинар-тренинг ұйымдастырғаны және еліміздің әр өңірінен келген құрдастарымен танысу мүмкіндігі үшін алғыстарын білдіріп, содан кейін импровизацияланған концерт ұйымдастырды.
