2025 жылдың 21 ақпанында сағат 10.00-де Қазақстан Республикасының ПІБ Президенттік орталығында Елордалық гидтер мен экскурсия жетекшілерінің І форумы өтеді.
Аталған іс-шара Астана қаласының әкімдігімен, "Астананы дамыту орталығы" ЖШС-мен, Астана гидтер клубымен, Қазақстанның гидтер және экскурсоводтар одағымен, «Kazakh Tourism ҰК» АҚ-мен бірлесіп ұйымдастырылды.
Форум 21 ақпанда атап өтілетін Бүкіләлемдік экскурсоводтар күніне орайластырылған.
2024 жылғы 2 қыркүйектегі Қазақстан халқына Жолдауында Мемлекет басшысы Қ.Тоқаев орнықты туризмді дамытудың маңыздылығын атап өтіп, оны ілгерілету жөніндегі күш-жігерді жандандыруды тапсырды.
2025 жылғы 28 қаңтарда өткен Үкіметтің кеңейтілген отырысында туризм саласын экономиканың өсуіне жаңаша серпін беретін маңызды бағыттардың біріне айналдыруды, инвестициялық тартымдылықты арттыру, инфрақұрылымды дамытуды, сапалы туристік қызмет көрсететін жоғары білікті мамандарды даярлауды тапсырды.
2024 жылы елдегі орнықты туризмді дамытудың ағымдағы сын-қатерлері мен перспективаларын талқылауға арналған fishbowl пікірталас алаңын ұйымдастырған ҚР ПІБ Президенттік орталығы бұл жолы туристік индустрияның алдыңғы қатарында тұрған және туристермен тікелей өзара іс-қимыл жасайтын гидтер мен экскурсоводтарды жинайды.
Форум барысында елордалық туризм саласының майталмандары кәсіби экскурсиялық қызметтің өзекті тақырыптары бойынша баяндамалар жасайды. Оның ішінде астаналық гидтер мен экскурсия жүргізушілерін кәсіби даярлау, қоғамдық бірлестіктер мен ұйымдар тарапынан ұсынылатын ынтымақтастық бағыттар және жеңілдіктер, салық және қаржылық сауаттылық сияқты тақырыптар қозғалады.
Іс-шараға 80-ге жуық астаналық және өңірлік экскурсиялық қызмет саласының өкілдері қатысады деп күтілуде.
БАҚ өкілдері аккредитациядан өтуі тиіс!
Оған қажетті мәліметті кестеге сәйкес 20.02.2025 күнгі сағат 17.00-ге дейін presidentcenterkz@gmail.com электрон поштасына жіберген жөн.
Байланыс нөмірі: 8 (7172) 69-30-57, +7 707 955 59 05 (Оңалбаева Сауле).
