ҚР Президенті Іс басқармасына қарасты Президенттік орталығында мемлекет және қоғам қайраткерлері Мұхаметжан Тынышбаев, Мұстафа Шоқай, Сәкен Сейфуллин, Тұрар Рысқұловтардың мерейтойларына арналған «Тұлғалар туралы толғам» атты көрмесі аясында әнші, актер, режиссер, ақын, драматург Қанат Құрмашұлы Жүнісовпенэкскурсия-сұхбат өтті.
Экскурсия-сұхбат кездесу форматында ұйымдастырыла отырып, еңбекқорлық, кәсібилік пен шығармашылық сынды құндылықтарды дәріптейді.
Бұл шараға Астана медицина университетінің, Мағжан Жұмабаев атындағы халықаралық колледжінің және Астана технологиялық колледжінің 100-ге жуық студенті қатысты.
ҚР Президенті Қ.К.Тоқаев өз сөзінде: «Адал әрі табанды еңбегімен табысқа жеткен адамдар қашанда құрметті, сыйлы болуы керек. Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады», - деген еді.
Заманауи қазақ өнеріне жаңа қадам, мәдени мұраға жарқын көрініс әкелген Қ.Қ. Жүнісов – нағыз таза еңбектің адамы. Бойында ақындық, әншілік, актерлік қабілеттері тоғысып, отандық драматургия саласында өзіндік қолтаңбасымен ерекше туындыларды ұсынып келе жатқан өз ісінің кәсіби маманы әрі тынымсыз еңбек адамы.
Ал еңбек адамы деген кім? Еңбек адамы дегеніміз, ең алдымен, адал жұмыс істейтін адам! Өзінің табысын маңдай терімен табатын, жанын салып жұмыс істейтін адам - еңбек адамы!
«Осындай үлкен мәдени ортада өскелең ұрпақпен кездесу – үлкен бақыт. Осы тамаша шараны ұйымдастырған Президенттік орталыққа алғысымды білдіремін. Менің мақсатым – халқымыздың батыры туралы көп біле бермейтін деректерді көрсету арқылы жас ұрпақтың ұлттық тарихты тануға деген қызығушылығын арттыру. Сәкен Сейфуллиннің қайраткерлігінің арқасында қазақ халқы өзінің нағыз «қазақ» атауына қайта оралды. Ол 20 жылға жуық өмірін қазақтардың халық ағарту, ағарту, мәдениеті мен рухани мұрасын дамытуға арнады, ұзақ жылдар бойы студенттер мен мұғалімдерге негізгі оқу құралы қызметін атқарған қазақ әдебиеті бойынша мектеп және жоғары оқу орындары оқулықтарының авторы.Өткен ғасырдың отызыншы жылдарында қазақ ауыз әдебиетін толық дерлік жинап, жүйелеп, жариялаған алғашқылардың бірі – Сәкен Сейфуллин. Сәкен үшін мәдениет пен рухани мұра мәселелері бірінші орында тұрды. Ағарту Халық Комиссарлары Кеңесінің төрағасы ретінде әзірлеп, қол қойған алғашқы құжаттардың бірі – республикада мұрағат және музей ісін жолға қою болды. Сонымен қатар дәл сол кезде Қазақстан өз сағатын халықаралық уақыт стандартына көшірді. Қазақстан аумағының халықаралық стандарттардың ақпараттық ықпалының заңдық және әлеуметтiк-мәдени кеңiстiгiне енгiзiлуiмен уақыт желiлiк болды және әлемдiк стандартқа сәйкес келтiрiлдi. Қазақстандағы осы ықпалды жүргізгендердің бірі С.Сейфуллин болды», – деп атап өтті Қ.Жүнісов елорданың орта және жоғары оқу орындарының студенттерімен кездесуінде.
200-ден астам әннің, 50-ге жуық әдеби кештер мен талай драмалық туындылардың авторы Қ.Қ. Жүнісов 2014 жылы қазақ өнері тарихында тұңғыш рет бірнеше жанрды қамтыған Шығармашылық апталық өткізсе, 2024 жылы өнер тарихында тұңғыш рет «Қолтаңба» атты Шығармашылық онкүндік (декада) өткізген.
Кездесу барысында Сәкен Сейфуллиннің өмір жолынан сыр шертетін Қ.Жүнісовтың «Сәкен» фильм-концертінің көрсетілімі ұйымдастырылды.
"Бүгінгі іс-шаралардың арқасында біз еліміздің тарихы, оның батырлары, Қазақстанның көрнекті тарихи тұлғалары туралы көптеген жаңалықтарды білдік. Біз Қанат Құрмашұлы Жүнісовтың «Сәкен» атты фильм-концертінен үлкен әсер алдық. Менің ойымша, бұл біз үшін осындай фильм мен Президент орталығының музей экспонаттары арқылы қазақ халқының тарихын, мемлекет тарихын мүлде жаңа бейнеде тануға үлкен мүмкіндік. Мен осындай кездесуді ұйымдастырғаны үшін Президенттікорталыққа алғысымды білдіремін", – деп бөлісті Мағжан Жұмабаев атындағы Халықаралық колледж студенті Өзбек Жанерке.
Театр өнері мен сахна заңдылықтарын қоса игерген көп қырлы талант иесі драматургияға ұлттық көзқарастағы пайыммен келіп, ұлт және мемлекет қайраткерлерінің бірі де бірегейі - С. Сейфуллиннің тұлғалық табиғатын ашуға әрі танытуға бағытталған талай тұшымды туындыларды тудырып, өзі актер ретінде бел ортасында жүрді.
Шығармашылық кездесу соңында Қанат Жүнісовке ҚР ПІБ Президенттік орталығының директорыныңатынан Алғыс хаты табыс етілді
