10 желтоқсан күні сағат 10.00-де Қазақстан Республикасының Президенттік орталығында оқушылардың «Астана: кеше, бүгін, ертең» аймақтық ғылыми-тәжірибелік конференциясының ашылуы өтеді.
Іс-шараны өскелең ұрпақтың бойында Қазақстан тарихына құрмет пен отансүйгіштік сезімін, тарихи сананы, толеранттылықты тәрбиелеу, өз Отанының мәдени-тарихи мұрасын зерттеуге деген қызығушылығын арттыру мақсатында Қазақстан Республикасының Президенттік орталығы және «Астана дарыны» дарынды балалар мен талантты жастарды анықтау және қолдау орталығы бірлесіп ұйымдастырды.
Конференция барысында секциялық отырыстарда Астана қаласы мен Ақмола облысының білім беру ұйымдарының 7-9 сынып оқушылары келесі бағыттар бойынша өз жұмыстарын ұсынады:
- Астана қаласының тарихы және мәдени мұрасы (қала және аймақтың 1991 жылға дейінгі тарихы);
- Астана – тәуелсіз Қазақстанның елордасы;
- Болашақтағы Астана.
Пленарлық отырысқа Қазақстан Республикасы Президенттік орталығының директорының міндетін атқарушы Серік СЫДЫҚОВ, Қазақстан Республикасы Парламенті Мәжілісінің депутаты Павел КАЗАНЦЕВ, Қазақстан Республикасы Оқу-ағарту министрлігі Орта білім беру комитетінің төрағасы Қаныбек ЖҰМАШЕВ, Астана қаласы бойынша Бала құқықтары жөніндегі өңірлік уәкілі Әсима БИМЕНДИНА, Астана қаласы Білім басқармасының басшысы Қасымхан СЕНҒАЗЫЕВ, «Астана дарыны» дарынды балалар мен талантты жастарды анықтау және қолдау орталығының басшысы Жанар БЕЙСЕНБАЕВА қатысады. Сондай-ақ Қазақстан Республикасының құрметті сәулетшісі, сәулет кандидаты Аманжол ЧИКАНАЕВ «Астананың бас жоспары және ХХІ ғасырдағы қала құрылысы идеологиясы» атты баяндама жасаса, тарих ғылымдарының докторы, Astana IT University профессоры Сәуле МАМЫТОВА «Астана – ұжымдық жад пен ұлттық бірегейліктің мәдени-символдық хабы» туралы баяндамасын ұсынады, ««Жас Ұлан» бірыңғай балалар мен жасөспірімдер ұйымы» Республикалық қоғамдық бірлестігінің төрайымы Динара САДВАКАСОВА «Астана қаласының жастары арасында экологиялық мәдениетті қалыптастыру» тақырыбына тоқталса, Қазақстан Республикасының гидтер, экскурсоводтар Одағының президенті, «Арман-тур» ұлттық туроператорының директоры Салтанат ӘБЖАНОВА Астанадағы экскурсиялық қызметтің мәселелері, оларды шешу жолдары және келешегі туралы әңгімелейді.
БАҚ өкілдері аккредитациядан өтуі тиіс!
Оған қажетті мәліметті кестеге сәйкес 09.12.2024 күнгі сағат 18.00-ге дейін presidentcenterkz@gmail.com электрон поштасына жіберген жөн.
Байланыс нөмірі: 8 (7172) 69-30-57, +7 707 955 59 05 (Оңалбаева Сауле).
Мекенжай: Астана қ., Бөкейхан көшесі, 1а
