2024 жылғы 23 ақпанда сағат 15.00-де Қазақстан Республикасының Президенттік орталығының Көркемсурет галереясында «Ботай – Ұлы дала мәдениеті» атты көрмесінің ашылуы өтеді.
Іс-шара Президенттік орталықтың «Қазақстан жолы» жобасы аясында Солтүстік Қазақстан облыстық музей бірлестігімен әріптестік байланыс пен музейаралық ынтымақтастықты нығайту мақсатында бірлесіп ұйымдастырылуда.
Көрменің мақсаты – еліміздің ең маңызды жетістіктерінің бірі «Ботай қонысы» археологиялық ескерткіші мен қазақстандық және шетелдік суретшілердің шығармашылығын насихаттау.
Елорда тұрғындары мен қонақтарының назарына «Ботай – Ұлы дала мәдениеті» көрмесінде 48 шығармашылық және пленэрлік жұмыстар ұсынылады. Экспозиция археологиялық артефактілермен, «Ботай» қонысы туралы фото және видео материалдар, шеберлерінің сәндік-қолданбалы өнер бұйымдарымен толықтырылған. Сондай-ақ, ежелгі өндіріс орындарын қайта құрумен интерактивті аймақ ұсынылады.
