2023 жылғы 17 қазан күні сағат 15.00-де Қазақстан Республикасының Президенттік орталығында «VIІ Абай оқулары» байқауының марапаттау рәсімі өтеді.
Мемлекет басшысы Қ.К.Тоқаев айқындап берген Абайдың «Толық адам» ілімінен бастау алатын «Адал азамат» тұжырымдамасын ілгерілендіру, дала данышпанының артында қалдырған мол мұрасын насихаттау және ақын сөзін келер ұрпақтың бағыт алатын темірқазығына айналдыру мақсатындағы байқауға еліміздің түкпір-түкпірінен 400-ден астам адам қатысты. Байқауда бақ сынағандардың қатарында әскери саланың мамандары, мемлекеттік қызметкерлер, мектеп мұғалімдері, студенттер, мектеп оқушылары мен балабақша тәрбиеленушілері де бар.
Іс-шараға ҚР Парламенті Сенатының депутаты Р. Рүстемов, ҚР Парламенті Мәжілісінің депутаты Ж. Амантайұлы, «Егемен Қазақстан» газетінің бас директоры Д. Қамзабекұлы, Л.Н. Гумилев атындағы ЕҰУ «Абай академиясы» ғылыми-зерттеу институтының директоры Ж. Әубәкір және қоғам қайраткерлері, абайтанушы ғалымдар, оқытушылар, жоғары оқу орындарының студенттері мен мектеп оқушылары қатысады.
