Қазақстан Республикасының Президенттік орталығында Ұлттық валюта күніне арналған іс-шаралар циклі жалғасуда.
Кезекті тақырыптық кездесу 13 қарашада өтті: бұл жолы эстафетаны Астана қаласындағы №82 «Дарын» мамандандырылған лицейінің оқушылары алды. Олар еліміздің қаржы жүйесінің қалыптасу тарихын тереңірек зерттеу мақсатында Президенттік орталыққа келді.
«Теңге – Қазақстан Республикасының валютасы» тақырыбындағы ашық сабақ барысында алтыншы сынып оқушылары Қазақстан аумағындағы ақша айналымының ғасырлар бойы жалғасқан сабақтастығын зерттеді. Ұстаздың жетекшілігімен балалар зерттеу топтарына бөлініп, Отырар мен Таразда соғылған көне түркілік «таңғалардан» бастап, Алтын Орда мен Қазақ хандығының күміс дирхемдеріне дейінгі ақша айналысының эволюциясын зерттеді.
Тәуелсіз Қазақстанның ұлттық валютасының алғаш рет айналымға енген күні – 1993 жылғы 15 қарашадағы оқиғаларға, сондай-ақ оның алғашқы авторлары мен бірегей дизайнына ерекше назар аударылды.
Сабақтың интерактивті форматы оқушыларға тарихи фактілермен жұмыс істеп қана қоймай, экономиканың негізгі ұғымдарын да түсінуге мүмкіндік берді.
Лицей оқушылары алған білімдерін платформадағы динамикалық интеллектуалды викторинада жарыса отырып, жауаптардың жылдамдығы мен дәлдігін көрсету арқылы бекіте алды.
Кездесу соңында балалар «Банкомат» форматында сабақтан алған әсерлерімен бөлісіп, тәуелсіздік символдары арқылы тарихи жадыны сақтаудың маңыздылығын атап өтті.
