ҚР ПІБ Президенттік орталығында корпоративтік мәдениетті дамыту жоспарын іске асыру аясында «Development day» форматындағы кросс-функционалдық кездесулер сериясы бастау алды.
Осылайша, ағымдағы жылдың 21 мамырында мамыр айындағы екі басты кәсіби мерекеге – Халықаралық музейлер күні мен Мәдениет және өнер қызметкерлері күніне орай іс-шара өтті.
Аталған кездесудің ұйымдастырушылары ретінде Орталықтың музейлік-көрме қызметінің негізін құрайтын бейінді қызметтер – Музей құндылықтарын есепке алу және сақтау қызметі, Экспозициялар мен көрмелерді ұйымдастыру қызметі және Экскурсиялық қызмет атқарды.
Бұл жобаның мақсаты – құрылымдық бөлімшелер арасындағы ішкі байланысты нығайту, кәсіби тәжірибе алмасу және Президенттік орталықтың дамуының негізгі бағыттарын бірлесіп талқылау. Әрбір құрылымдық бөлімшеге осы кездесулерді ұйымдастыру мен модельдеу бойынша маңызды миссия жүктелген.
Сонымен қатар, іс-шара аясында ұйым ұжымына музей ісі мен экскурсиялық қызмет саласындағы заманауи трендтер мен озық жұмыс әдістемелерімен танысу мүмкіндігі берілді.
