2025 жылдың 5 қыркүйегінде сағат 15.00-де ҚР ПІБ Президенттік орталығында заманауи қазақстандық суретші, өнертанушы және дизайнер Анар Аубакирдің «Абай толқынында» атты жеке көрмесінің ашылу салтанаты өтеді. Көрме ұлы ойшыл, ақын Абай Құнанбайұлының 180 жылдығына және оның рухани мұрасына арналады.
Өзіндік қолтаңбасымен ерекшеленетін, қазақ өнерінің дәстүрлері мен заманауи кескіндеме техникасын үйлестіре білген Анар Аубакир көрерменге жаңа туындылар топтамасын ұсынады. Әрбір картина – Абай философиясын, оның өмір, табиғат пен адам туралы ойларын, сондай-ақ ағартушылық пен өркениетке ұмтылысын қайта пайымдау әрекеті.
«Абай толқынында» көрмесі – ұлы ақынға деген құрмет қана емес, оның қазіргі заманғы өнер мен мәдениетке деген әсерлі ой толғауы. Келушілер қазақтың дәстүрлі өрнектері символдық бейнелермен тоғысып, терең және көп қабатты туындылар жасайтын жарқын түстер палитрасында жасалған кескіндемелерді көреді.
Анар Аубакирдің картиналары ішкі толғаныстан туындайды, онда философиялық әрі терең жеке бейнелер көрініс табады. Киіз, гобелендер, костюмдер, ою-өрнектер, тұрмыстық бұйымдар мен қазақ мәдениетінің киелі нышандары метафораға айналып, адамның түп-тамырымен және болмыстың жоғары өлшемдерімен байланысын ашатын «кілтке» айналады.
Анар Аубакир – ҚазҰӨА магистрі, қазіргі таңда Қазақ ұлттық университетінде дәріс береді. Ол кескіндеме, дизайн және мүсін өнері бойынша көптеген халықаралық және республикалық байқаулардың лауреаты.
Анар Аубакирдің еңбектері Қазақстан, Татарстан, Германия және Ресейдің мемлекеттік және жеке коллекцияларында сақтаулы.
