26 наурыз бен 3 сәуір аралығында «Әділетті қоғам: саяси қағидаттар және құндылықтар жүйесі» атты екі күндік семинар-тренингтерге онлайн форматта Абай атындағы Қазақ ұлттық педагогикалық университетінің және Қ.Жұбанов атындағы Ақтөбе өңірлік университетінің студенттері, сондай-ақ Қостанай және Солтүстік Қазақстан облыстарының жоғары сынып оқушылары қатысты.
Тыңдаушылар өз пікірлерін жазып, алған әсерлерімен бөлісті.
Смирновка №1 орта мектебінің 9 сынып оқушысы (Аққайың ауданы, СҚО) Томирис Абдуалиева: «Мен өте көп жаңа ақпараттарға қанықтым. Семинар пайдалы әрі танымдық және ақпараттық болды. Әділеттілік тұжырымдамасына қатысты тақырыптар кеңінен әрі терең талқыланып айғақтармен дәлелді түрде ашылды. Нақты өмірден алынған мысалдар арқылы ұсынылған теңдік пен әділеттілік арасындағы айырмашылықтардың көрнекі түрдегі түсіндірмесі ерекше әсер қалдырды».
Амангелді жалпы орта білім беретін мектебінің 9 сынып оқушысы (Амангелді ауданы, Қостанай облысы) Мадина Әбілғазы: «Семинар-тренинг барысында мен өз бойымда қандай қасиеттер бар екенін және тұлғалық жетілу мақсатында ары қарай қалай және немен жұмыс істеу керектігін түсіндім. Семинар бізге әділетті қоғамның қалай құрылатынын, оның негізгі принциптері мен құндылықтарын, сондай-ақ әрбір азаматтың белсенділігі мен жауапкершілігі осындай қоғамды құруда шешуші рөл атқаратынын түсінуге көмектесті».
Абай атындағы ҚазҰПУ студенті Әсел Серікова: «Әділетті қоғам құрудың қағидаттары мен құндылықтар жүйесін талқылау өте қызықты болды. Біз мемлекеттік саясаттың мәнін тереңірек түсіндік және бізді қызықтыратын сұрақтарға нақты жауаптар алдық. Егер болашақта да осындай тренингтер ұйымдастырылса, бұл жастардың саясатқа деген қызығушылығын арттыратыны сөзсіз».
Zhubanov University студенті Артем Коломойцев: «Біз әділеттілік идеясын және оның қоғам үшін маңыздылығын қарастырдық, сонымен қатар ежелгі дәуірден бергі әртүрлі ойшылдардың көзқарастарын зерделедік. Маған бәрінен бұрын Әл-Фарабидің сөздері ұнады. Оның пікірінше, әділ адам — ақыл мен ізгілікті ұстанатын адам, ал әділетсіздік надандық пен жамандықтан туады. Осыдан менің түсінгенім, егер адам ақыл-ойды басшылыққа алып, ізгілікке ұмтылса, ол әділ әрекет етеді, яғни бұл игіліктер мен міндеттерді адал бөлу, басқалардың құқықтарын құрметтеу және қысымға жол бермеу. Керісінше, әділетсіздік надандық, арсыздық пен құмарлық басым болған жерде пайда болады, өйткені мұндай адамдар тек өз мүдделерін ғана ойлайды және оларды қоғамның игілігі ойландырмайды», – дейді.
