28 наурызда Қазақстан Республикасының Президенттік орталығында «Мұғалімнің кәсіби шеберлігінің қадамдары» қалалық педагогикалық идеялар шеберханасы өткізілді.
Ұстаздардың кәсіби өсуі жолында музейлік педагогиканы дамыту, жаңа жұмыс түрін іздестіру мақсатында ұйымдастырылған іс-шараға елорда мектептерінің тарих пәнінің мұғалімдері қатысты.
Президенттік орталықтың қызметкерлері музей педагогикасына негізделген «Жәдігерлер сыр шертеді...» циклы бойынша «Батырлар институты: дәстүрлер, мәртебе және қару-жарақ», «Қазақ халқының музыка өнері», Қазақстан Республикасының мемлекеттік рәміздері» музейлік сабақтарын, сонымен қатар «Қазақстан Республикасындағы сайлау жүйесі» тренинг сабағын өткізді. Бұл сабақтар оқушылардың өз елінің тарихына деген қызығушылығын тереңдетіп, отансүйгіштік қасиетке баулуға, еліміздің мемлекеттік рәміздерін қастерлеуге, саяси өмірде өздерінің азаматтық ұстанымын қалыптастыруға бағытталған.
Президенттік орталық елордалық білім беру мекемелерімен серіктестік негізінде республикалық деңгейдегі іс-шараларды жүйелі түрде өткізеді. Орталықтың ғылыми-білім беру бағдарламасы оқушылардың түрлі жастарына және әлеуметтік топтарына бейімделген музейлік педагогиканың барлық бағыттарын қамтиды.
Астана қаласы әкімдігі «Әдістемелік орталығының» әдіскері Жанар Төлеуғасымқызы «Музейдегі сабақ» жобасы туралы айтып, болашақта бірлескен жобаларды жүзеге асыруға сенім білдірді.
Іс-шара соңында қатысушыларға сертификаттар табыс етілді.
