Қазақстан Республикасы Президенті Іс Басқармасы Президенттік орталығы С. Аманжолов атындағы Шығыс Қазақстан университеті, Х. Досмұхамедов атындағы Атырау университеті, Қарағанды индустриялық университеті және К.И. Сәтбаев атындағы Қазақ ұлттық зерттеу техникалық университетінің студенттік белсенділері үшін «Әділетті қоғам: саяси қағидалар және құндылықтар жүйесі» тақырыбында онлайн семинар-тренингтер ұйымдастырды.
Екі күндік вебинарлар барысында жастар дәрістерге, интерактивті жаттығуларға, командалық ойындарға, жобалық жұмыстар мен тренингтерге қатысты.
Лекторлар елдің қазіргі заманғы даму стратегиясын анықтайтын негізгі аспектілерді ашып көрсетті. Атап айтқанда, жаңа Қазақстанды құру тұжырымдамасы, Мемлекет басшысы Қ.Тоқаевтың Қазақстан халқына арнаған «Жаңа жағдайдағы Қазақстан: іс-қимыл уақыты» Жолдауы, «Әділетті Қазақстан: тұжырымдамалық негіздер және құндылықтық бағдарлар» саяси бағдарламасы, тарихи дәстүрлер мен әділеттілік тұжырымдамасының заманауи үлгілеріне ерекше назар аударылды.
Семинар қатысушылары алған білімдерін практикалық тренингтер барысында сәтті қолданды.
«Вебинарды жоғары деңгейде ұйымдастырғандары үшін алғысымызды білдіреміз. Терең білімі мен жан-жақты дағдылары бар білікті мамандар өзекті мәселелерді ашып қана қоймай, болашақ жетістіктердің негізі болатын жаңа білімдер берді. Олар Қазақстан Республикасы студенттері үшін сапалы білім беру кеңістігін қалыптастыруға жыл сайын қосатын үлестері үшін алғысымызды білдіреміз. Президенттік орталықтың барлық қызметкерлеріне осы семинар-тренингке қатысуға мүмкіндік бергендері үшін ризашылығымызды білдіреміз. Бұл тек жаңа білім көзі ғана емес, сонымен қатар білім, ғылым мен биік мақсаттарды бағындыруға мотивация беретін шара болды. Жаңа цифрлық технологиялар мен білім беру әдістерін қолдана отырып өткізілген екі күндік семинар біздің мемлекетімізбен бірге үлкен болашаққа дұрыс бағытта келе жатқанымызды тағы бір дәлелдеді», – деп атап өтті Қарағанды индустриялық университетінің Тәрбие жұмысы және жастар саясаты департаментінің директоры Нина Попова.
