Ақпараттық технологиялар саласына деген қызығушылығымның бастау көзі мектеп қабырғасында, дәлірек айтқанда, 1999 жылы қалыптасты. Сол уақыттан бастап мені компьютер әлемі мен бағдарламалау ерекше қызықтырып, болашағымды осы саламен байланыстыруды мақсат еттім. Жас кезімнен жаңа технологиялардың болашағы мықты екеніне сенімді болдым және бұл сенім уақыт өте келе нығая түсті. Университет қабырғасында білім ала жүріп, ақпараттық технологиялар саласының өркениет дамуының басты қозғаушы күшіне айналатынына нақты көз жеткіздім.
Менің кәсіби еңбек жолым Қазақстан Республикасының Ұлттық академиялық кітапханасында басталды. Осы мекемеде IT маманы ретінде қызмет етіп, электрондық құжат айналымы жүйесін енгізу және мемлекеттік электрондық кітапхана қорын дамыту сияқты жауапты әрі маңызды жобаларға қатыстым. Бұл кезең мен үшін үлкен тәжірибе жинақтау, кәсіби өсу және жаңа технологияларды іс жүзінде қолдануды меңгеру кезеңі болды.
Мамандық таңдау кезінде қоғамға пайдасын тигізетін, тұрақты сұранысқа ие әрі болашақта дамуға мүмкіндік беретін салаға басымдық бердім. Заманауи технологиялардың қарқынды дамуы, білімді үнемі жаңартып отыру қажеттілігі мен үшін басты факторлар болды. Сондай-ақ өз бейімділіктерім мен қабілеттерімді ескере отырып, осы мамандықтың нарықтағы тұрақтылығы мен келешектегі өзектілігіне мұқият назар аудардым.
Еңбек жолымда күрделі әрі қызықты жобалармен қатар, қиындықтар да аз болмады. Әсіресе, жаңа жүйелерді енгізу барысында кездескен техникалық кедергілер мен күтпеген мәселелер кәсіби біліктілігімді шыңдауға ықпал етті. Электрондық мемлекеттік кітапхана қорының каталогын құру, Қазақстан Республикасы Президентінің жанындағы Адам құқықтары жөніндегі комиссияның порталына техникалық қолдау көрсету, LOTUS электрондық құжат айналымын енгізу, Ұлттық академиялық кітапхананың ақпараттық жүйелерін дамыту және Л.Н.Гумилев атындағы Еуразия ұлттық университетінде студенттерді оқулықтармен қамтамасыз ету мен оқу процестерін автоматтандыру бойынша жобалар менің кәсіби дамуымда маңызды орын алды.
Қазіргі таңда Қазақстан Республикасы Президенттік орталығында ақпараттық жүйелерді жоспарлау, енгізу және олардың үздіксіз жұмысын қамтамасыз ету міндеттерімен айналысамын. Сонымен қатар, «Цифрлық Президенттік қор» жобасы мен инновациялық 3D-тур жобаларын іске асырып, музей жабдықтарының үздіксіз жұмысын қамтамасыз етудемін. Бұл жобалар заманауи технологияларды тиімді қолданудың үлгісі ретінде танылып, орталық келушілерінің жоғары бағасына ие болды.
Алдағы уақытта кәсіби деңгейімді одан әрі жетілдіріп, заманауи цифрлық технологияларды меңгеруді жалғастыру арқылы еліміздің ақпараттық-технологиялық дамуына үлес қосуды мақсат етіп отырмын.
ҚР ПІБ Президенттік орталығының
Цифрландыру қызметінің
жетекші сарапшысы
