Қазақстан Республикасының Президенттік орталығында Қазақстан халқы Ассамблеясының 30 жылдығына арналған Астана қаласы балалар көркемсурет мектебі – ЮНЕСКО клубы түлектерінің «Әлем жас суретшілердің көзімен» дипломдық жұмыстарының көрмесінің ашылуы өтті.
Астана қаласындағы Балалар көркемсурет мектебі - ЮНЕСКО клубы – бұл жай ғана оқу орны емес, 1983 жылдан бастап таланттарды тәрбиелеп отырған нағыз шығармашылық шеберхана. Елорданың ең көне оқу орындарының бірі. Қызмет атқарған жылдарында мектеп жас таланттарды дамыту үшін бірегей жағдай туғыза отырып, дәстүрлер мен инновациялар тоғысатын нағыз көркемдік білім беру орталығына айналды. Астана қ. Балалар көркемсурет мектебі – ЮНЕСКО клубы Қазақстандағы қалалық, республикалық және халықаралық балалар бейнелеу шығармашылығы жобаларының үйлестірушісі болып табылады.
Мектеп өзінің жетістіктерін мақтан тұтады, оның оқушылары бірнеше рет беделді халықаралық және республикалық байқаулардың жеңімпаздары атанып,
БКМ қоржынына көптеген марапаттар мен дипломдар әкелді. 2008 жылы мектеп ЮНЕСКО-ның ерекше мәртебесіне ие болды, бұл оның Қазақстанның мәдениеті мен өнерін дамытуға қосқан үлесін айғақтайды.
БКМ балаларды бірегей жұмыстарды жасауға шабыттандыратын шығармашылық жобаларды белсенді түрде жүзеге асырады. Олардың қатарында «Туған жерім» халықаралық сәндік-қолданбалы өнер байқауы, «Қызыл кітап балалардың көзімен» республикалық байқауы, сондай-ақ «ЭКОмода» қалдық материалдардан жасалған костюмдердің қалалық байқауы және басқа да көптеген байқаулар бар. Бұл жобалар оқушылардың шығармашылығын ашып қана қоймай, оларды табиғат пен мәдени мұраға ұқыпты қарауға үйретеді.
Ең жарқын және ауқымды жобалардың бірі – Астана қ. БКМ - ЮНЕСКО клубы мен ҚР Президенттік орталығының бірлескен жобасы – «Туған өлкем» республикалық бағдарламасы, оның шеңберінде жыл сайын өңірлік көркемсурет мектептерінің көрмелері өтеді.
«Бүгінгі вернисаж бізді елордамыздың жас таланттарының шығармашылығымен таныстырады. Жарқын түстер палитрасы балаларға өздерінің қоршаған әлемге, сезімдеріне, көңіл-күйлеріне деген көзқарастарын картиналарында көрсетуге көмектесті. Көрме – оқушылар мен суретшілер-педагогтардың бірлескен тиімді жұмысының нәтижесі. Қазіргі әлемде шығармашылық бала тұлғасының қалыптасуында маңызды рөл атқарады. Сондықтан Президенттік орталық балалардың әлеуетін ашуға, олардың өзін-өзі көрсетуіне және шығармашылық идеяларын жүзеге асыруға бағытталған бастамаларды әрдайым қолдауға дайын» – деді Қазақстан Республикасының Президенттік орталығының орынбасары Ботагоз Қайыпова.
«Әлем жас суретшілердің көзімен» көрмесінде көрермендер бейнелеу өнерінің түрлі техникасында жасалған жарқын және жан-жақты тақырыптағы туындыларды көреді.
Әрбір жұмыс – жас суретшілердің өз еліне, отбасына, табиғаты мен мәдениетіне деген сүйіспеншілігі туралы шынайы туындысы. Түлектер өздерінің картиналары арқылы эмоциялар мен армандарға толы әлемге деген көзқарастарымен бөліседі.
Көрменің ашылу күні Астана қаласы КШМ педагогтары «Адам бейнесінің нобайлары» және «Ананың портреті» тақырыптарында шеберлік дәрістерін өткізеді.
Айта кетейік, көрме 2025 жылдың 8 сәуіріне дейін жалғасады.
