Президенттік орталықтың қызметкерлері «Қ.Құлажанов атындағы Қазақ технология және бизнес университеті» АҚ колледж студенттеріне «Қазақстан жастары: әлеуметтік портрет және перспективалар» тақырыбында дәріс өткізді.
Дәріс барысында мемлекеттің ең маңызды стратегиялық және кадрлық ресурсы ретіндегі жастардың рөлі қарастырылды. Негізгі қозғаушы күш ретінде жастар саяси және әлеуметтік-экономикалық үдерістердің сипатына ұдайы әсер етіп, серпінді идеялар тудырып, жаңа жобалардың сарқылмас қайнар көзі бола отырып, еліміздің бүгіні мен болашағын айқындайды.
Еліміздегі ғылыми-зерттеу институттарының социологиялық деректері негізінде әзірленген қазақстандық жастардың әлеуметтік портретіне ерекше назар аударылды. Жастардың құндылық бағдарларын түсіну мемлекетке өзінің саясаты мен даму стратегияларын қоғамның қазіргі сын-қатерлері мен қажеттіліктеріне бейімдеуге мүмкіндік береді.
Жұмысшы мамандықтары жылы аясындағы іс-шаралардың жүзеге асырылуы студенттер арасында үлкен қызығушылық тудырды. Жұмысшы мамандықтар жылының бастамасы кәсіптік-техникалық білім беруді трансформациялауға және отандық өндірістерде жұмысшы мамандар тапшылығының өткір проблемасын шешуге бағытталған. Ең сұранысқа ие мамандықтардың қатарында: инженерлер, энергетиктер, жүргізушілер, технологтар, құрылысшылар, темір ұстасы және т.б. бар.
