2025 жылдың 12 наурызында Қазақстан Республикасы ПІБ Президенттік орталығының кітапханасында Қазақстанның халық ақыны, Халықаралық Физули атындағы сыйлықтың лауреаты Тұманбай Молдағалиевтің 90 жылдығына арналған әдеби сағат өтті.
Тұманбай Молдағалиев 1935 жылы 20 наурызда Алматы облысы Еңбекшіқазақ ауданының Жарсу ауылында дүниеге келген.
1956 жылы әл-Фараби атындағы Қазақ ұлттық университетінің филология факультетін бітірген.
1956-1986 жж. «Лениншіл жас» (қазіргі «Жас Алаш»), «Пионер» (қазіргі «Ақ желкен») газеттерінің әдеби қызметкері, «Жазушы» баспасының бас редакторы, «Балдырған» журналының жауапты хатшысы, «Жалын» альманахының бас редакторы, Қазақстан Жазушылар одағы басқармасының хатшысы, «Балдырған» журналының бас редакторы болып жұмыс істеді.
1957 жылы алғашқы өлең кітабы «Студент дәптері» басылып шықты.
Кейін: «Кәмилә» (1960), «Көктем таңы» (1961), «Алатау қызы» (1963), «Зулайды күндер» (1965), «Жүрек ояу қашан» (1972), «Махаббат оты сөнбейді» (1975), «Жиырма бесінші көктем» (1980), «Тынық мұхит дәптері» (1985) және т.б. өлеңдер, поэмалар мен әндер жинағы жарық көрді.
Т. Молдағалиевтің лирикасы әуезділігімен ерекшеленеді, сондықтан да қазақтың көрнекті композиторлары Н. Тілендиев, Ш. Қалдаяқов, А. Бейсеуов, Е. Рахмадиев, Қ. Шілдебаев басқа да танымал композиторлардың «Жан досым», «Құстар қайтып барады», «Бақыт құшағында», «Әнім сен едің», «Отан ана», «Қайран менің жүрегім», «Шақырады көктем», «Алматы түні» т.б. жүздеген әндерге өлең жазған.
Тұманбай Молдағалиев қазақ поэзиясына ең жарқын лирик ақын ретінде ғана емес, Қазақстандағы ең үздік балалар ақындарының бірі ретінде танымал. Оның шығармалары: «Етекбай атам үйінде», «Арман мен Бота» және т.б.
Ол көркем аударма саласында да жемісті еңбек етті. Ол ТМД-ның шетелдік және көпұлтты әдебиет классиктері Дж.Байронның, М.Лермонтовтың, Г.Гулямның, Р.Гамзатовтың және т.б. шығармаларын қазақ тіліне аударды.
