Дүниежүзілік туризм күнін мерекелеу аясында ҚР ПІБ Президенттік орталығында «Қазақстандағы тұрақты туризм» тақырыбында Fishbowl-пікірталас өтті.
Іс-шараны «Атамекен» ҰКП қолдауымен ҚР Президенттік орталығы, Еуразиялық туризм қауымдастығы, Қалалық туризмді дамыту орталығы (Астана қ.) бірлесе ұйымдастырды.
Fishbowl-пікірталас Қазақстан Республикасының Президенті Қ.К. Тоқаевтың 2024 жылғы 2 қыркүйектегі Қазақстан халқына Жолдауындағы негізгі басымдықтарды ескере отырып, тұрақты туризм қағидаттарын ілгерілетуге және осы маңызды саладағы ынтымақтастықты нығайтуға бағытталды. Мемлекет басшысы еліміздің басты туристік нысандарындағы инфрақұрылымды жаңғыртудың, туристік жобаларды іске асыру кезінде экологиялық тепе-теңдікті сақтаудың және табиғатқа зиян келтірудің алдын алудың маңыздылығын атап өткен болатын.
Бүгінгі кездесу Қазақстандағы тұрақты туризмді дамытудың ағымдағы сын-қатерлері мен келешегін талқылауға арналған бірегей платформаға айналды және еліміздің туристік секторын жаңғыртуға бағытталған ҚР Президенті Іс басқармасы мен БҰҰ жанындағы Дүниежүзілік туристік ұйым (UNWTO) арасындағы Ынтымақтастық туралы меморандумға қол қою аясында ерекше өзектілікке ие болды.
Қазақстан Республикасы Президенттік орталығының директоры Бақытжан Темірболат өзінің құттықтау сөзінде, туризм әлемдік экономиканың серпінді дамып келе жатқан салаларының бірі екенін, оның өсу қарқыны көптеген басқа салалардан екі есе дерлік жылдам екенін атап өтті.
«Мемлекет басшысы 2024 жылғы 2 қыркүйектегі Қазақстан халқына Жолдауында еліміздің туристік әлеуетін дамытудың стратегиялық маңыздылығын атап өтті, әсіресе туризмді дамыту қоршаған ортаны қорғау және мәдени мұрамызды сақтаумен қатар жүруі керектігін айтты. Тәжірибе жүзінде бұл туризм саласына құйылған инвестицияның биылғы жылы өткен жылдың сәйкес кезеңімен салыстырғанда екі есеге артып, 390 миллиард теңгеден асқанынан көрінді. Бүгінде ҚР Туризм және спорт министрлігі арқылы жалпы құны шамамен 400 млрд теңгені құрайтын 61 инфрақұрылымдық жоба жүзеге асырылуда», - деді Б.Темірболат.
«Атамекен» ҰКП Туризм индустриясы комитетінің төрағасы Юлия Якупбаева өз сөзінде біздің еліміздің бірегей табиғи аумақтары және туристерді тартатын бай мәдени-тарихи базасының болғаны Қазақстан үшін туризмнің негізгі бағыттары эко- және мәдени туризм болып табылатынын атап өтті.
«Тұрақты туризм – экономикалық өсуді, қоршаған ортаны қорғауды және әлеуметтік-мәдени байланыстарды дамытуды үйлесімді үйлестіруге мүмкіндік беретін Қазақстан үшін стратегиялық даму жолы. Тұрақты туризм қағидаттарын енгізу Қазақстанға халықаралық туристер мен инвесторлардың назарын аударып, аймақтағы көшбасшы болуға көмектеседі», - деді Ю.Якупбаева.
Өз кезегінде Қалалық туризмді дамыту орталығының президенті Әйгерім Есеналиева халықаралық туризмді дамыту, оның ұлттық экономиканы өркендетуге, халықтың көп бөлігін жұмыспен қамтуға қосқан үлесі, сондай-ақ отандық туристік салаға инвестициялар тарту құралдары туралы айтып берді.
Өз баяндамасында Еуразиялық туризм қауымдастығының президенті Рысты Қарабаева Дүниежүзілік туристік ұйым, Дүниежүзілік саяхат және туризм жөніндегі кеңестің, Euromonitor International және басқа да ірі халықаралық ұйымдардың зерттеулеріне негізделген Қазақстандағы қалалық туризмді дамыту тақырыбын қозғады.
«Қала туризмі бойынша VI жаһандық саммитте тұрғындар – қала қонақтары, ал туристер уақытша тұрғындар екені айтылды. Қазіргі таңдағы өзекті мәселе – қалалық туризмді дамыту үшін жалпы қалаларды жаңғырту қажет. Бұл урбанизацияның сын-қатерлеріне жауап беретін «Ақылды қала» тұжырымдамасымен тығыз байланысты. Қазірдің өзінде көптеген дестинациялар туристік индустрияға әсер ететін «ақылды қала» технологияларын енгізуде», – деп сөзін түйіндеді Р.Қарабаева.
Іс-шараға Астана қаласы мәслихатының депутаттары, Қазақстанның туристік саласының сарапшылары, мүдделі мемлекеттік органдардың өкілдері, қазақстандық жоғары оқу орындарының профессор-оқытушылар құрамы мен қоғам қайраткерлері қатарынан 60-қа жуық адам қатысты.
Ашық пікірталас барысында қатысушылар қазақстандық туризм саласындағы өзекті мәселелер мен мүмкіндіктерді талқылады, сондай-ақ отандық туристік инфрақұрылымды жақсартуға, инвестициялар тартуға, елдің табиғи және мәдени мұрасын сақтауға, озық цифрлық технологиялардың тиімді құралдарын пайдалана отырып, республикада туристер үшін қолайлы жағдайлар жасауға бағытталған ұсынымдар әзірленді.
Анықтама: Туризм әлемдік экономиканың ең ірі ғана емес, сонымен бірге ең жылдам дамып келе жатқан саласы, яғни туризмнің дамуы экономиканың басқа салаларының өсу қарқынынан 2 есе асып түседі. Инвестициялық салымдардың тиімділігі сияқты негізгі көрсеткіштер бойынша туризмді мұнай өндіру өнеркәсібімен салыстыруға болады.
Туризмді жедел дамыту үшін 2019 жылы Қазақстан Республикасының Үкіметі Қазақстан Республикасының туристік саласын дамытудың 2019 - 2025 жылдарға арналған мемлекеттік бағдарламасы бекітілді.
Туризм саласының инвестициялық тартымдылығы күн санап артып келеді. ҚР Туризм және спорт министрлігі «Kazakh Tourism» ҰК» АҚ-мен бірлесіп туристік саланың инвестициялық тартымдылығын арттыру шарттарын белгіледі.
«Kazakh Tourism» ҰК» АҚ ақпараты бойынша Мемлекеттік бағдарлама шеңберінде Астана қаласының аумағын, Каспий теңізінің, Алакөл, Балқаш көлдерінің жағалауын, Щучинск-Бурабай, Баянауыл, Имантау-Шалқар курорттық аймақтарын, Алматы өңірінің тау кластерін және «Байқоңыр» ғарыш айлағын қамтитын елдің негізгі 10 туристік дестинациясын кешенді дамыту көзделген Қазақстанның ТОП-10 өңірінің мастер-жоспарлары әзірленді.
Бүгінгі таңда туризмдегі инвестициялық тартымдылықты арттыру мақсатында артықшылықтар беру, жеңілдікті кредиттеу, сыйақы мөлшерлемелерін және кредиттердің пайыздық мөлшерлемелерін субсидиялау сияқты маңызды шаралар айқындалды.
Салалық инвестициялық жобалардың дерекқорын қалыптастыру жұмыстары жүргізілуде. Бүгінде оған 40 мыңнан астам жұмыс орнын құруға мүмкіндік беретін 1 694,5 млрд теңгеге жуық сомаға 125 инвестициялық жоба кірді.
