Бүгін, 30 тамызда, біз Конституция күнін мерекелеп отырмыз. Биылғы жылы біздің Ата заңымызға 30 жыл толып отыр.
Өткен отыз жыл ішінде Қазақстанның қалыптасуындағы Конституцияның маңыздылығы мен тарихи рөлі туралы айту керек емес те. Біздің еліміз тәуелсіздіктің елең-алаңында қандай болды, енді қазір қандай екендігін үлкендер жағы жақсы біледі, ал жастарға бұл туралы білу үшін ата-анасынан сұрастырып, тарихи құжаттарға жүгіну, кітаптардан оқып, тіпті болмағанда ғаламторға қарау жеткілікті.
Сондықтан да осы бір мерейлі күні мен басқа нәрсе туралы, дәлірек айтсам Қазақстанның Тұңғыш Президенті Нұрсұлтан Назарбаевтың басшылығымен біздің Негізгі заңымызды әзірлеумен айналысқан адамдар жайында айтқым келіп отыр.
Конституция жобасын әзірлеу жөніндегі жұмыс тобына Нағашыбай Шайкенов, Майдан Сүлейменов, Владимир Ким, Бауыржан Мұхамеджанов, Юрий Басин, Еркеш Нұрпейісов, Константин Колпаков, Анатолий Котов сынды құқықтанушы ғалымдар кірді.
Топты ұлттық заңгерлік мектептің ардагерлері – академиктер Салық Зиманов, Сұлтан Сартаев, Мұрат Баймаханов, Салахиден Сабикеновтермен қатар Қазақстанның мемлекеттік-құқықтық жүйесінің қайнар бастауында тұрған және отандық конституционализмнің негізін қалаған академик Ғайрат Сапарғалиев басқарды.
Ұлы тұлғалардың бірі айтқандай, «Өткенін білмеген ұлттың болашағы бұлыңғыр». Сондықтан да өз тарихымызды әрқашан да жадымызда сақтап, оған өзінің лайықты үлесін қосқан және қосып жүргендерді құрмет тұтқанымыз абзал.
Мереке құтты болсын! Баршамызға ырыс-береке тілеймін! Отанымыз өркендеп, қарыштай берсін!
Құрметпен,
Қазақстан Республикасы
Президенттік орталығының
директоры
Бақытжан ТЕМІРБОЛАТ
